50 பைசாவில் தொடங்கி 2 லட்ச ரூபாய் வரை… பாட்ரிசியாவின் வெற்றிக் கதை!

by -22 views
50 பைசாவில் தொடங்கி 2 லட்ச ரூபாய் வரை… பாட்ரிசியாவின் வெற்றிக் கதை!
50 பைசாவில் தொடங்கி 2 லட்ச ரூபாய் வரை… பாட்ரிசியாவின் வெற்றிக் கதை!

இளமைப் பருவம்!

நாகர்கோவிலைச் சேர்ந்த ஒரு கிறிஸ்தவ குடும்பத்தைச் சேர்ந்தவர்தான் பாட்ரிசியா தாமஸ். இவரது பெற்றோர் இருவருமே அரசு வேலை பார்ப்பவர்கள். இவரது இளமைக் காலம் மகிழ்ச்சியான ஒன்றாகவே இருந்தது. அது நீண்ட காலம் நீடிக்கவில்லை. சென்னை குயின் மேரீஸ் கல்லூரியில் படிக்கும்போது நாராயண் என்பவருடன் இவருக்குக் காதல் ஏற்பட்டது. ஒரு இந்து மதத்தவரை திருமணம் செய்துகொள்ள பாட்ரிசியாவின் பெற்றோர் ஒப்புக்கொள்ளாததால் அவர்களை எதிர்த்து நாராயணை திருமணம் செய்துகொண்டார். அப்போது அவருக்கு வயது 17.

தனிமரமான பாட்ரிசியா!

திருமணம் ஆன சிறிது காலத்திலேயே பாட்ரிசியாவின் கணவர் போதைப் பழக்கத்தில் மூழ்கத் தொடங்கினார். இதனால் பாட்ரிசியாவின் கனவுகள் அனைத்தும் சின்னா பின்னமாகின. குடும்பத்தை நடத்தப் பணம் இல்லாமல் தவித்தார். வேறு ஆதரவும் இல்லை. அப்போது அவர் ஒரு முடிவை எடுக்க வேண்டியதாக இருந்து. ஒன்று மரணம், மற்றொன்று விதியை எதிர்த்துப் போராடுவது. வயிற்றில் குழந்தை இருந்த சூழலில் தனித்துப் போராட முடிவு செய்தார். தன் கணவரை விட்டுப் பிரிந்து வெளியேறினார். இரண்டு குழந்தைகளுடன் கதியற்று நின்றார் பாட்ரிசியா.

patricia

ஊறுகாய் வியாபாரம்!

பாட்ரிசியாவுக்கு எந்த வேலையும் தெரியாது. படிப்போ சான்றிதழ்களோ இல்லை. யாரும் தனக்கு வேலை தரமாட்டார்கள் என்று அவருக்குத் தெரியும். பெண் என்றாலே அவள் அடுப்படியில் வெந்து வாட வேண்டும் என்று கூறும் காலம் அது. அதையே தனக்கு சாதகமாக மாற்றிக் காட்டினார் பாட்ரிசியா. சமையல் கலையில் ஓரளவுக்கு கைதேர்ந்தவராக இருந்த அவர், தனது வீட்டிலேயே ஊறுகாய், ஜாம் போன்றவற்றைத் தயாரித்து தனது தாய் வேலைபார்க்கும் அலுலவகத்தில் விற்பனை செய்யத் தொடங்கினார். இதற்கு நல்ல வரவேற்பு இருந்தது. சமையல் கலைதான் தனக்கும் தனது இரண்டு குழந்தைகளுக்கும் சோறுபோடும் என்று அப்போது அவர் முடிவுசெய்தார்.

மெரினாவில் தள்ளுவண்டிக் கடை!

எத்தனை நாட்களுக்குத்தான் வீட்டிலேயே வியாபாரம் செய்வது என்று நினைத்து 1982ஆம் ஆண்டு ஜூன் மாதம் மெரினாவில் சிறிதாக ஒரு தள்ளுவண்டிக் கடை ஆரம்பித்தார். அதில் டீ, காபி, பஜ்ஜி, போண்டா, சமோசா போன்றவற்றை விற்பனை செய்யத் தொடங்கினார். முதல் நாளே அவருக்கு சரியாக வியாபாரம் ஆகவில்லை. அன்று அவருக்கு வெறும் 50 பைசா மட்டுமே கிடைத்தது. மனம் தளராத பாட்ரிசியா தொடர்ந்து விற்பனையில் ஈடுபட்டார். அவரது கைவண்ணம் சென்னை வாசிகளை ஈர்த்தது. வியாபாரம் சூடுபிடித்தது. ஆயிரங்களில் வருமானம் கிடைத்தது.

sandeepa

தொழில் முன்னேற்றம்!

மெரினாவில் கொடிகட்டிப் பறந்த பாட்ரிசியாவின் தள்ளுவண்டிக் கடை சேரி ஒழிப்பு வாரியத்தின் கண்ணில் பட்டது. சேரி ஒழிப்பு வாரியத்தின் தலைவர் தனது அலுவலகத்தில் கேண்டீன் தொடங்குமாறு கேட்டார். இந்த வாய்ப்பைப் பயன்படுத்திக் கொண்ட பாட்ரிசியா இதுபோன்ற பல இடங்களில் கேண்டீன் தொடங்கினார். தொழில் வளர்ச்சியடைந்தது. மத்திய அரசு சார்பாக நடத்தி வரும் துறைமுக மேலாண்மை பயிற்சிப் பள்ளியில் சுமார் 700 மாணவர்களுக்கு உணவு சமைத்துக் கொடுக்கும் வாய்ப்பும் பாட்ரிசியாவுக்குக் கிடைத்தது. இவ்வாறு பல இடங்களில் பாட்ரிசியாவின் உணவுத் தொழில் பிரபலமானது.

மகளின் நினைவாக உணவகம்!

எல்லாம் சரியாகப் போய்க்கொண்டிருந்த நிலையில், அச்சரப்பாக்கம் பகுதியில் கார் விபத்து ஒன்றில் பாட்ரிசியாவின் மகள் சந்தீபாவும் அவரது கணவரும் உயிரிழந்தனர். அதிர்ச்சியில் மூழ்கிய பாட்ரிசியா தனது மகனிடம் பொறுப்பை ஒப்படைத்துவிட்டு வீட்டில் முடங்கிக் கிடந்தார். சிறிது காலம் கழித்து புதிய உத்வேகத்துடன் மீண்டும் களத்தில் இறங்கினார். அச்சரப்பாக்கம் பகுதியில் தனது மகள் விபத்துக்கு உள்ளானபோது ஆம்புலன்ஸ் உதவி கிடைக்காததால்தான் மரணமடைந்தார் என்பதால் அந்தப் பகுதியில் ஆம்புலன்ஸ் சேவையைத் தொடங்கினார் பாட்ரிசியா. தனது மகளின் நினைவாக சந்தீபா ரெஸ்டாரண்ட் என்ற பெயரில் ஹோட்டல் தொடங்கினார்.

hotel

லட்சங்களில் வருமானம்!

தனியொரு பெண்ணாக தொழில் தொடங்கிய பாட்ரிசியாவின் ரெஸ்டாரண்ட்களில் இப்போது 200க்கும் மேற்பட்டவர்கள் பணிபுரிகின்றனர். 50 பைசாவில் தொடங்கிய இவரது உணவுத் தொழிலில் இப்போது ஒரு நாளைக்கு 2 லட்சத்துக்கு மேல் வருமானம் வருகிறது. இவரது விடா முயற்சியால் ஏற்பட்ட வளர்ச்சியைப் பாராட்டி 2010ஆம் ஆண்டில் சிறந்த பெண் தொழில்முனைவோருக்கான விருதை இந்திய வர்த்தக தொழில் துறை கூட்டமைப்பு (FICCI) வழங்கியது. பெண்ணாக இருந்தாலும், யாருடைய ஆதரவும் இல்லாமல் இருந்தாலும் விடா முயற்சியும் மன உறுதியும் இருந்தால் வெற்றிபெறலாம் என்பதற்கு பாட்ரிசியாவின் வெற்றிக் கதை ஒரு உதாரணமாகும்.

Leave a Reply

Your email address will not be published. Required fields are marked *