விமானத்தையே மிஞ்சிய பெட்ரோல் விலை! வாகன ஓட்டிகள் ஷாக்!!

by -29 views

கார், பைக்கில் செல்வதை விட இனி நடந்தே போய்விடலாம் என்ற மனநிலைக்கு வாகன ஓட்டிகள் வந்துவிட்டனர். அந்த அளவுக்கு பெட்ரோல், டீசல் விலை உயர்ந்து நிற்கிறது. முன்பெல்லாம் மாதத்துக்கு ஒரு முறை இரண்டு முறை விலை மாற்றம் இருக்கும். அப்போது பெரிய அளவில் தாக்கம் இருக்காது. ஆனால் தினசரி விலை நிர்ணய முறை அமலுக்கு வந்த பிறகு வாகன ஓட்டிகள் ஒவ்வொரு நாளும் விலையேற்றம் என்ற கொடுமையை அனுபவித்து வருகின்றனர்.

பெட்ரோல் விலை இப்போது 100 ரூபாயையும் தாண்டி விற்பனை செய்யப்பட்டு வருகிறது. பெட்ரோல் விலை ஒவ்வொரு நாளும் புதிய உச்சத்தை எட்டி மோசமான சாதனைகளைப் படைத்து வருகிறது. இந்நிலையில், புதிய சாதனையாக, பெட்ரோலின் விலையானது விமான எரிபொருளின் விலையை விட உயர்ந்து அதிர்ச்சியளித்துள்ளது. அக்டோபர் 17 நிலவரப்படி ஒரு லிட்டர் பெட்ரோல் விலை டெல்லியில் லிட்டருக்கு 105.84 ரூபாயாக இருந்தது. மும்பையில் ரூ.111.77க்கு விற்பனை செய்யப்பட்டது. டீசல் விலை டெல்லியில் ரூ.102.52 ஆகவும், மும்பையில் ரூ.94.57 ஆகவும் இருந்தது.

பெட்ரோல் விலை: எகிறும் விலை நிலவரம் – புலம்பும் வாகன ஓட்டிகள்!
விமானங்களில் பயன்படுத்தப்படும் எரிபொருள் (ATF) விலை டெல்லியில் ஒரு கிலோ லிட்டருக்கு ரூ.79,020.16 ஆக உள்ளது. அதாவது ஒரு லிட்டர் விமான எரிபொருள் விலை ரூ.79. பெட்ரோல் விலையுடன் ஒப்பிட்டுப் பார்த்தால் விமான எரிபொருளின் விலை 30 சதவீதம் குறைவாக உள்ளது. இவ்வாறு விமான எரிபொருளின் விலையை விட பெட்ரோல், டீசல் விலை அதிகமாக உயர்ந்திருப்பது வாகன ஓட்டிகளை அதிர்ச்சியில் ஆழ்த்தியுள்ளது. இப்படியே சென்றால் இன்னும் சில மாதங்களில் பெட்ரோல் விலை 200 ரூபாயை நெருங்கிவிடும் போல.

இதனால்தான் பெட்ரோல் – டீசலை ஜிஎஸ்டியின் கீழ் கொண்டுவர வேண்டும் என்ற கோரிக்கைகள் உள்ளன. ஆனால் அரசின் வருமானத்தைக் கருத்தில்கொண்டு ஜிஎஸ்டியில் சேர்க்கப்படாமலேயே உள்ளது.

One thought on “விமானத்தையே மிஞ்சிய பெட்ரோல் விலை! வாகன ஓட்டிகள் ஷாக்!!

Leave a Reply

Your email address will not be published. Required fields are marked *