மாநிலங்களுக்கு கூடுதல் நிதி… மத்திய அரசு அறிவிப்பு!

by -54 views

கொரோனா பாதிப்பைத் தொடர்ந்து இந்தியா தற்போது பொருளாதார ரீதியாக வளர்ச்சியடையத் தொடங்கியுள்ளது. மத்திய அரசும் மாநில அரசுகளும் தேவையான திட்டங்களை வகுத்து உள்கட்டுமான வசதிகளை மேம்படுத்தி, வேலைவாய்ப்புகளைப் பெருக்கி, கொரோனாவுக்கு முந்தைய நிலையை அடைய முயற்சித்து வருகின்றன. இதற்கான பாதையில் மாநிலங்களின் திட்டங்கள் என்ன என்பது குறித்து விசாரிக்கும் கலந்தாய்வுக் கூட்டம் நேற்று நடைபெற்றது. இதற்கு மத்திய நிதியமைச்சர் நிர்மலா சீதாராமன் தலைமை தாங்கினார்.

பல்வேறு மாநிலங்களும் யூனியன் பிரதேசங்களும் தங்களது யோசனைகளையும் கோரிக்கைகளையும் முன்வைத்தன. அவை அனைத்தையும் நிதியமைச்சர் நிர்மலா சீதாராமன் கேட்டறிந்தார். எதிர்காலத் திட்டங்கள் என்ன என்பது குறித்தும் ஆலோசிக்கப்பட்டது. மாநிலங்கள் அனைத்தும் தங்களுக்குக் கூடுதலாக நிதியுதவி வழங்கப்பட வேண்டும் என்று கோரிக்கை வைத்தன. வரிப் பங்கீடு உள்ளிட்ட விஷயங்களில் மாநிலங்களுக்கு அதிக உதவி தேவை என்று வலியுறுத்தப்பட்டது.

இக்கூட்டத்தின் முடிவில் செய்தியாளர்களைச் சந்தித்த நிர்மலா சீதாராமன், ஆலோசனைக் கூட்டத்தின் சாராம்சம் குறித்துப் பேசினார். மேலும், மாநிலங்களுக்கு மத்திய அரசு தரப்பிலிருந்து தேவையான உதவிகள் வழங்கப்படும் எனவும், வரிப் பங்கீட்டில் மாநிலங்களுக்கு கூடுதலாக ரூ.47,541 கோடி வழங்கப்படும் எனவும் தெரிவித்தார். மொத்தம் 14 தவணைகளாக மாநிலங்களுக்கான நிதி விடுவிக்கப்படுகிறது. இதில் மூன்று தவணைகள் சென்ற மார்ச் மாதத்தில் விடுவிக்கப்பட்டன.

அடுத்த தவணை மார்ச் மாதத்தில் விடுவிக்கப்படும் சூழலில் அதற்கு முன்பாகவே இந்த நவம்பர் மாதத்தில் மாநிலங்களுக்கு வழங்கப்படவுள்ளது. கொரோனா பாதிப்பைத் தொடர்ந்து மத்திய அரசின் வரி வசூல் தற்போது அதிகரித்து வருவதால் அதன் பங்கீட்டை மாநிலங்களுக்கும் வழங்கும் முனைப்பில் உள்ளது. சென்ற மாதம் ஜிஎஸ்டி வசூல் கூட அதிகமாக இருந்தது. மாநிலங்களுக்கான ஜிஎஸ்டி இழப்பீட்டுத் தொகையும் விரைவாகவே வழங்கப்பட்டது.

Leave a Reply

Your email address will not be published. Required fields are marked *