பொருளாதார வளர்ச்சி… நம்பினால் நம்புங்கள்!

by -27 views

கடந்த நான்கு – ஐந்து ஆண்டுகளாகவே இந்தியப் பொருளாதார வளர்ச்சி குறித்த விமர்சனங்கள் அதிகமாக உள்ளன. 2016ஆம் ஆண்டில் பணமதிப்பழிப்பு நடவடிக்கை மேற்கொள்ளப்பட்ட நாள் முதலே இந்தியப் பொருளாதாரம் வீழ்ச்சிப் பாதையில் பயணித்து வருகிறது. அதுவும் கொரோனா வந்த பிறகு நிலைமை இன்னும் மோசமாகிவிட்டது. முன்னெப்போதும் இல்லாத அளவுக்கு மிகப் பெரிய பொருளாதார வீழ்ச்சியை இந்தியா சந்தித்தது. ஆனால் அரசின் நடவடிக்கைகளால் வீழ்ச்சியிலிருந்து மீண்டு, வெற்றிப் பாதையில் பயணிக்கத் தொடங்கியுள்ளது இந்தியப் பொருளாதாரம்.

பல்வேறு ஆய்வு நிறுவனங்களும் இந்தியப் பொருளாதார வளர்ச்சி குறித்து நம்பிக்கை தெரிவித்து வருகின்றன. சுவிஸ் நாட்டைச் சேர்ந்த யூபிஎஸ் செக்யூரிட்டீஸ் நிறுவனம், இந்த நிதியாண்டில் இந்தியப் பொருளாதாரம் 9.5 சதவீதம் வளர்ச்சியைச் சந்திக்கும் என்று மதிப்பிட்டுள்ளது. சென்ற ஆண்டில் இந்தியா 7.3 சதவீத வீழ்ச்சியைச் சந்தித்திருந்த நிலையில் தற்போது மீண்டும் நம்பிக்கை திரும்பியுள்ளது. இந்த ஆண்டின் இரண்டாம் பாதியில் வேகமான வளர்ச்சி காணப்பட்டாலும் 2022-23 நிதியாண்டில் 7.7 சதவீத வளர்ச்சி மட்டுமே இருக்கும் என்று இந்த ஆய்வில் கணிக்கப்பட்டுள்ளது.

கொரோனாவை வென்ற இந்தியப் பொருளாதாரம்! மெச்சும் உலக வங்கி!
ரிசர்வ் வங்கியின் மதிப்பீட்டின் படி இந்த நிதியாண்டில் இந்தியா 10.5 சதவீத வளர்ச்சியை எட்டும் என்று எதிர்பார்க்கப்படுகிறது. இந்தியப் பொருளாதார வளர்ச்சி குறித்து மத்திய அமைச்சர் ஹரிதீப் சிங் புரி சில தினங்களுக்கு முன்னர் பேசியிருந்தார். இந்தியப் பொருளாதாரம் 2024-25 ஆண்டு வாக்கில் 5 லட்சம் கோடி டாலர் இலக்கை அடையும் எனவும், அதற்கு அடுத்த ஐந்து ஆண்டுகளில் மேலும் வளர்ச்சி கண்டு 10 லட்சம் கோடி டாலர் மதிப்பை எட்டும் எனவும் அவர் நம்பிக்கை தெரிவித்திருந்தார். இந்நிலையில் தற்போது சுவிஸ் ஆய்வு நிறுவனமும் இந்தியாவுக்கு ஆதரவாக அறிக்கை வெளியிட்டுள்ளது.

Leave a Reply

Your email address will not be published. Required fields are marked *